محترم حضرت حکیم صاحب السلام علیکم!تین سال قبل مجھے دل کا دورہ پڑا تھا۔ ابتدائی طبی امداد کے لیے مجھے ٹوبہ ٹیک سنگھ کے ہسپتال لے جایا گیا وہاں تین سے چار دن رہنے کے بعد مجھے چھٹی ہوئی، اس کے بعد مجھے فیصل آباد کارڈیالوجی لایا گیا وہاں پر انہوں نے ای سی جی کی اور مجھے دوائی دینے کے بعد کہا آپ کو دل کی تکلیف ہے۔ مجھے انہوں نے انجیوگرافی کے لیے نو ماہ کا وقت دے دیا اور کہا یہ دوائی کھاتے رہیں میں دوائی کھاتا رہا لیکن انجیوگرافی نہیں کروائی۔ اسی دوران عبقری میں مجھے ایک ٹوٹکہ ملا جو کہ ارجن درخت کا چھلکا تھا وہ میں پنسار کی دکان سے خرید کر پندرہ سے بیس دن پینے کے بعد ای سی جی کروائی تو وہ بالکل ٹھیک تھی۔ ڈاکٹر نے کہا کہ آپ کو دل کی کوئی تکلیف نہیں۔اب میں صحتمند ہوں۔طریقہ استعمال: ارجن کی چھال دو انچ کا ٹکڑا ڈیڑھ کپ پانی میں رات کو بھگودیں‘ صبح ہلکی آنچ پر پکائیں‘ جب ایک کپ رہ جائے تو چسکی چسکی پی لیں‘ آدھے گھنٹے بعد ناشتہ کرلیں۔اسی طرح شام کو عصر کے بعد بھی پی سکتے ہیں۔ (مسعود احمد، سمندری)
بواسیرکا مجرب نسخہ
محترم حضرت حکیم صاحب السلام علیکم!اللہ تعالیٰ آپ کو اور آپ کی نسلوں کو تاقیامت قائم و دائم رکھے اور جس طرح سے آپ انسانیت کی خدمت کررہے ہیں اللہ تعالیٰ اپنی شان کے مطابق آپ کو نواز دیں اور آپ کی نسلیں آپ کے اس عمل کی وجہ سے خوشحال اور آباد ہوں۔اس نفسا نفسی کے دور میں آپ نے دکھی انسانیت کے دکھ بانٹ کر اور ان کو اعمال پر لگا کر جو نیکی کی ہے اللہ آپ کو اس کا اجر دے ، آج تک کسی سے یہ نہیں سنا تھا کہ آپ اپنی آنے والی نسلوں کے لیے بھی دعا کریں اور کس طرح آپ کے اعمال اور آپ کے بولے ہوئے الفاظ آپ کی نسلوں کا پیچھا کرتے ہیں جب سے آپ کا رسالہ عبقری پڑھنا شروع کیا اور آپ کے درس سنے تو یہ حقیقت ہم پر واضح ہوئی۔ میں عبقری رسالہ 2014 سے پڑھ رہی ہوں اس میں دیئے گئے وظائف اور بہت سے نسخہ بھی استعمال کیے بہت فائدہ ہوا۔ میری والدہ کو بواسیر کا مسئلہ تھا ڈاکٹر کہتے ہیں کہ قبض ہے۔ اس کے لیے عبقری سے دیکھ کر میں نے اپنی والدہ کو ثابت اسپغول 100 گرام اور تارا میرا کے بیج 100 گرام ملا کرایک کھانے کا چمچ صبح ‘ دوپہر‘ شام تازہ پانی کے ہمراہ استعمال کروائے اب ماشاء اللہ سے وہ ٹھیک ہیں۔ نوٹ: اگر پانی گھڑے کا ہو تو نسخے کا اثر دوبالا ہوجاتاہے۔(ثناء، گوجرہ)
دانتوں کے خطرناک مسائل کیلئے آسان ٹوٹکہ
محترم حضرت حکیم صاحب السلام علیکم!مجھے عرصہ سے دانتوں کا مسئلہ تھا۔ صبح جب اٹھتا تو منہ سے خون بھر بھر کر آتا بہت سے منجن استعمال کیے لیکن فرق نہیں پڑا۔ پھر ایک دن عبقری رسالہ میں تلوں کے تیل کے فائدہ کی تحریر پڑھی کہ صبح نہار منہ دو چمچ تلوں کا تیل منہ میں ڈال کر جتنی دیر ہوسکے منہ میں گھماتے رہیں منہ کے سارے جراثیم اس میں آجائیں گے، نگلنا بالکل نہیں تھوک دینا ہےمنہ کی صفائی کرکے ایک گھنٹے بعد ناشتہ کرسکتے ہیں۔ میں نے یہ ٹوٹکہ مسلسل استعمال کیا جس سے میرا مسوڑوں کا مسئلہ حل ہوگیا۔ (محمد شعیب، میلسی)
پتھر ہضم لکڑ ہضم
محترم حضرت حکیم صاحب السلام علیکم!میرے پاس ایک نسخہ ہے جو مجھے میری والدہ سے ملا۔میرے بچوں کا جب بھی ہاضمہ خراب ہوتا تو میں یہی نسخہ استعمال کرواتی ہوں جس سے شفاء ملتی ہے۔ نسخہ:۔ریوندچینی، پوست ہریڑ زرد، ماجو، کچور اور زہر مہرہ ہر ایک کو برابر وزن میںلے کر کر پس لیں اور کسی شیشے کی بوتل میں رکھ لیں۔ مسور کے دانے کے برابر شہد کے چمچ کے ساتھ دیں۔ ہر تیسرے دن یا روزانہ بھی دے سکتے ہیں اس سے بچے کا ہاضمہ درست رہتا ہے اس کا اتنا فائدہ ہے کہ پتھر ہضم لکڑ ہضم والا نسخہ ہے۔ (پوشیدہ، واہ کینٹ)